Shaam ka waqt tha. Mai apne kaam se vapas aa rahi thi. Aaj na jaane kyu par bahot thakan mahesus ho rahi thi. Aaj mai car lekar nahi aayi thi, socha tha office se vapas aate samay thodi der samunder ke kinare baithungi. Kuchh dhundhli yaado ko tarotaza karungi jispe waqt ne marham laga diya tha. Kuchh hi der mai ek riksho aayi or mai baithkar chal di. Riksha driver ko bola samunder ki or le chal. Vo thoda shock hokar meri or dekhne laga. Fir bola madam abhi is waqt vaha jaana safe nahi rahega. Par maine uski nahi suni. Aaj dil kuchh or hi chahta tha.
Dhire dhire riksha samunder ki or jaane lagi. Kuchh hi samay mai hum log vaha pahunch gaye. Riksha driver thoda achha tha, bola madam kitni der rahena hai aapko yaha? Agar aap chaho to mai wait kar sakta hu. Par maine use jaane ko kaha. Vo chala gaya. Or mai apni pyari si yaado mai khone lagi jise maine kai saalo se dil ke kisi kone mai kaid karke rakhi thi.
Takriban 12 saal pahele ki baat hai. Meri mulakat Aarav se huyi thi. Ek anjaane safar pe hum log mil gaye the. Pata nahi kyu par unka saath muje achha lagta tha. Hum log fir roj milne lage. Ghanto tak hum log baate karte the fir bhi baate puri nahi hoti thi. Ek din aise hi baate kar rahe the tab achanak se usne bataya ki vo kaam ke silsile mai UK jaa raha hai. Mai udas ho gayi. Par usne muje yakin dilaya ki vo bahot jald vapas aayega. Or maine hanste huye use bye kahe diya.
UK jaane ke baad kuchh samay tak baato ka silsila vahi raha . Par fir dhire dhire uske call bahot kam aane lage. Maine socha shayad busy raheta hoga isiliye call nahi aata. Kuchh samay baad to jaise vo bhul hi gaya. Na call na baate hoti thi. Mai karti to bhi vo uthata nahi tha. Mai bahot udas rahene lagi. Papa se meri ye halat nahi dekhi jaati thi. Shadi ke liye mummy papa ne bahot samjaya par mainne saaf inkar kar diya.
Fir ek din papa ne mujse kaha kyu na tu kuchh kaam karna shuru kar de, Kaam mai tera man rahega to tuje hi taklif kam hogi. Or mai papa ki is baat ko nakar na saki. Ek mahine mai hi muje job mil gayi or mai bhi kaam mai apna man parone lagi. Aise hi waqt bhi bitne laga. Mai Aarav ko ab almost bhul chuki thi. Khud ko kaam mai itna busy rakhne lagi ki koi bhi yaad ko aane ki izazat hi nahi di maine.
Aaj itne saalo baad yaha samunder ke kinare unhi yaado ko taza karne ka khayal isiliye aaya ki aaj isi jagah itne saalo ke baad Aarav mujse milne aanevala tha. Suna to tha ki vo yaha India aaya hua hai. Par phone karne ka man nahi kiya tha. Fir achanak se ek call aaya. Uhaya to pata chala ki ye Aarav tha. Formality ke saath maine baat ki. Fir usne bilkul pahele ki tarah bina hichkichaye mujse puchha kab milogi? Man mai kai sawal the , socha ki use puchhu ki aakhir usne aisa kyu kiya? Par fir rahene diya.
Tab achanak se Aarav ne aakar pichhe se aawaz di to mai atit se bahar aayi. Vo bilkul pahele jaisa tha. kuchh bhi sharam uske chahere pe nahi dikhayi di thi. Maine aise hi just usse baate karna shuru kiya. Gussa to bahot tha par kuchh bol nahi paa rahi thi. Tab achanak se usne muje propose kiya, or mai sahem uthi. Mai avirat drashti se use nihar rahi thi. Or vo bolta jaa raha tha bolta jaa raha tha.
Usne bahot sari baate ki , or jaise jaise vo baate karta gaya mere sawal ke khudbkhud jawab milte gaye. Mai bahot khush ho gayi thi. Jis pyar pe mera vishwas kho chuka tha vo vapas laut aaya tha. Mera Aarav vapas laut aaya tha, mere paas , humesha ke liye. Maine khushi se uske samne dekha or shamakar kaha papa se milne kab aa rahe ho ghar. vo masti se bola chalo madam yaha se aap uthoge tabhi to papa se mil paunga na. Or mai ek hi pal mai khadi hokar usse lipat gayi. Mera Aarav aaj mere paas tha or mai uski baaho mai. Aaj sabkuchh vapas mil gaya tha muje or hum dono khushi se ghar ki or chal diye.
Shikha
